In Dei Nomine. Amen.

Anno bismillesimo quinto, Pontificatus autem Sanctissimi Domini Nostri Divina Providentia Benedicti Papae XVI anno primo, die vero vigesima octava Iunii, hora decima nona cum dimidio legitime intimata, in Aula pro Tribunali constituta apud Patriarcalem Archibasilicam Lateranensem:
coram Eminentissimo ac Reverendissimo Domino Camillo, Tituli Sanctae Agnetis extra Moenia, Sanctae Romanae Ecclesiae Cardinali Ruini, Sanctissimi Domini Nostri Papae in Urbe Vicario Generali, pro Tribunali sedente; praesentibus et adsistentibus Reverendis Patribus Dominis Ioanne- Francisco Bella, Iudice Delegato, et Francisco Maria Tasciotti, Iudice Adiuncto; praesentibus quoque Reverendo Domino Iosepho D'Alonzo, Promotore Iustitiae, Clarissimo Domino Iosepho Gobbi, Notario Actuario, necnon Domino Francisco Allegrini, Notario Adiuncto: omnibus per Decretum eiusdem Eminentissimi Cardinalis Vicarii electis ac nominatis; comparuit Reverendissimus Dominus Sławomir Oder, qui, exhibens procurationis mandatum in suam personam factum ac supplicem libellum, petiit atque institit legitime inchoari processum super vita et virtutibus in specie, necnon super miraculis in genere Servi Dei IOANNIS PAULI II (in saec. Caroli Wojtyła), Summi Pontificis, omniaque fieri necessaria et opportuna. Tunc Eminentissimus Cardinalis Vicarius mandatum procurationis ac supplicem libellum inspexit ac illa inspicienda tradidit Promotori Iustitiae, cumque Promotor nihil opponendum haberet, Eminentia Sua ea uti legitima et authentica declaravit, mihique Notario tradidit in calce huius sessionis registranda. Confirmavit insuper omnes in Decreto a Se electos pro huius processus constructione, qui omnes munus sibi commissum acceptarunt seque paratos declararunt ad processum rite instituendum et absolvendum.

Hinc in primis Eminentia Sua, deinde Iudices, Promotor Iustitiae ac Notarii, unus post alium, sequens iuramentum emiserunt ac sese subscripserunt uti sequitur: "In Nomine Domini. Ego N.N., iuro me, in processu super vita et virtutibus in specie, necnon super miraculis in genere Servi Dei Ioannis Pauli II, Summi Pontificis, quavis personarum acceptione posthabita, fideliter ac diligenter impleturum munus mihi commissum; secretum servaturum de testium depositionibus ac de iis cum nemine locuturum, exceptis Tribunalis Officialibus pro hoc processu constitutis; denique dona cuiusvis generis, occasione processus oblata, non accepturum. Sic me Deus adiuvet".

 

...............................................................	Vicarius Generalis
...............................................................	Iudex Delegatus
...............................................................	Iudex Adiunctus
...............................................................	Promotor Iustitiae
...............................................................	Notarius Actuarius
...............................................................	Notarius Adiunctus

 

Huiusmodi iuramentis expletis, Promotor Iustitiae interrogatoria exhibuit; Causae autem Postulator notulam testium produxit, reservata sibi facultate alios quoque testes producendi et inducendi, non se tamen adstringens ad omnes testes inductos examinandum ac deinde iuramentum protulit uti sequitur: "In Nomine Domini. Ego Sławomir Oder, Postulator in Causa Beatificationis et Canonizationis Servi Dei Ioannis Pauli II, Summi Pontificis, iuro me fideliter officium impleturum; nihilque dicturum vel facturum quod, directe vel indirecte, veritatem ac iustitiam offendere aut testium libertatem coarctare valeat; secretum denique, iis qui in causa expedienda partem habent, impositum, servaturum. Sic me Deus adiuvet".

 

...............................................................

Cause Postulaor

Quo iuramento praestito, Em.mus Cardinalis Vicarius et Iudices interrogatoria ac notulam testium admiserunt et deinde deputaverunt pro loco audientiarum praesentis processus Aulam Tribunalis Vicariatus Urbis vel alium pro opportunitate locum; pro diebus vero et horis, destinarunt omnes dies feriales, reservata tamen sibi facultate praedicta loca et tempora variandi pro re nata; item decreverunt futuram sessionem habendam die et hora statuendis; mihi autem Notario iusserunt pro illa die et hora praemoneri primum e testibus excutiendis, qui in designato loco compareat.

Tandem commiserunt mihi ut de omnibus in praesenti sessione gestis publicum conficerem instrumentum et sese, una cum Promotore Iustitiae ac Notariis, subscripserunt uti sequitur:
 

...............................................................	Vicarius Generalis
...............................................................	Iudex Delegatus
...............................................................	Iudex Adiunctus
...............................................................	Promotor Iustitiae
...............................................................	Notarius Actuarius
...............................................................	Notarius Adiunctus

Super quibus omnibus et singulis ut supra gestis, ego Notarius hoc praesens publicum instrumentum confeci in forma; me subscripsi requisitum in fidem ac signo Tribunalis Vicariatus Urbis, quo utor, Subscribeem meam communivi. Actum Romae, die, mense, anno, loco quibus supra.

Ita est.
 

...............................................................

Notarius de primordialibus

 

---